Kopzorng door de Mogge, HWU 352
Moi maoten en maotinnen,
Ik zagge stôkkies in de kraante staon dat er asbest in sommige broodsoorten zol zitten. Asbest, dat is toch dat onbraandbaore spul? Now, mooi toch? De minsen dee zôk brood eten, krieng volngs mi’j nooit meer last van zoerbraanden. Maor now eêm wat “serieuzer”. De Midweekfeesten moên Vestingfeesten worden, teminste dat viendt ’t bestuur van Steenwiek Vestingstad. Ik ebbe mien eing gedachten daorover, maor ik bin meer beni’jd naor wat jullie d’r van vien’n en of jullie ’t eens bin’n mit de motieven van Stichting Steenwiek Vestingstad.
Veural op de Kallenkoterallee wordt te ard ereden, vien’n de bewoners van de Gaogels. Daor snap ik dus elemaole niks van. Ik ebbe ook wel ies (stiekem) prebeerd om daor wat sneller te rieden dan toe’estön is, maor dat völ nog lange neet mit, want ’t is daor van veur naor achter ene complete slaolombaene. Wat vien’n jullie, overdriêm’ de bewoners neet ’n beetien?
Z’em ineensen de Looijergrachtbrogge om’edeupt tot liefdesbrogge en a’j van mekaere ol’n, ma’j d’r een slottien an’angen. En a’j dat edön em’n, moe’j ’t sleuteltien in de grachte gooien en dan ku’j reken’ op eeuwig gelôk. Now bin ‘k er veurige weke ies langes eleupen, maor ’t völ mi’j good teung oeveule slotties d’r an de brogge ‘angen. Mien vraoge an jullie is: gaot ’t eigelijk wel good mit ’t liefdesleêm’ in Steenwiek?
