Kopzorng door de Mogge, HWU 357
Moi maoten en maotinnen,
De gemeente is van plan om ’t karakter van Steenwiek Vestingstad te verstaarken mit bomen en dat mot dan, volngs Luc Greven, gebeuren an de Peerdemaark en d’Oosterpoorte . Now bin ik ni’jskierig of jullie dat ’n good plan vien’n. Sellef eb-ik over de entree van ’n vestingstad eel aandere beelden (en dat eb ik jullie al ies verteld), maor is ’t plan van de gemeente now zo good, dat daordeur meer minsen naor Steenwiek komen? Want daor gaot ’t och omme?
Veur de zoveulste keer is de mesiekkoepel in Rams Woerthe vernield. De daoders bin netuurlijk weer onbekend. Persoonlijk bin ik veur ’t verplaesen van de koepel naor de Maark. Daor ston i’j vrogger ook. En op de Maark is donkt mi’j ook meer sociale controle, meer as in de Tuun. Egbert Luchtmeijer, de nachtburgemeester van Rams Woerthe, worde sellefs bedreigd, toen i’j opmaarkings mök teung vernielzuchtige jeugd dee weer ies ’t een en aander an ’t slopen waren. Wordt ’t onderaand gien tied om de koepel naor de Maark te verplaesen? Of mot i’j in de Tuun bliêm’ en laot de gemeente dan elke keer maor opdraeien veur de skaede? Zeg ’t maor.
Onze Steenwieker journalist Kobie Storm oldt er mee op. Ik viene dat best wel jammer, want as gien aander volgd’i’j wat er in Steenwiek gebeurde en waor neudig gaf i’j ongezolten zien mening as i’j ’t aarngs neet mee eens was. En kritisch de politiek volng, daor is i’j ook wel staark in. Waor ik mi’j zorng over maeke is, wee zien opvolger wordt. Welke journalist kan of durft daomiet nog teunggas te geêm op beveurbeeld de besluten van B. & W. of de gemeenteraod? Em jullie daor ook ’n mening over?
Op de facebookpagina van ‘He’j ’t wel eurd’ ek ’n poossien eleden de vraoge esteld of jullie ook ’n team em’n dat meedot an de Steenwiekerlaand tael- en kennisquiz. ’t Bleef aekelig stille op facebook. Daoromme nog ies de vraoge: doon jullie as maekers van ’t streektaelprogramma mornaomd ook mit an de quiz? Volngs mi’j ku’j daor aoste neet onderuut koôm’.
Uitzending zondag 30 maart van 12.00 tot 13.00 uur.
