Kopzorng deur de Mogge HWE 358
Moi maoten en maotinnen,
Van kiends of an bin ‘k op’egreuid mit de kaarmes op de Bouwmaark (dat is teungwoordig de Zendemaark) en d’Elfduzend. En veur d’eerste keer was ‘r gien kaarmes op de Zendemaark. Neet dat ’t daoromme minder drok was, want dat lag, donkt mi’j ook an ’t weer, maor toch … weer ’n treditie vort uut Steenwiek. Volngs de kaarmesexploitant is ene kaarmes in ’t jaor genog. Bin jullie ’t daor mit eens? Of moên wi’j ons ’n jaorenlange treditie laoten ofpakken deur een of aanderekaarmesexploitant?
‘Vestingstad wil anpak van de winkelleegstaand’, kopde ’t Olde Wieffien. Zol dat now eindelijk ies ’n keer lôkken? Zol Steenwiek eindelijk weer ies ’t kloppend koop’art van Noordwest-Overiessel worden? Sellef twiefele ik d’r an, maor miskien bin jullie wat optimistischer.
De Steenwieker toorn krig disse zomer weer ’n toornwachter. Of neumen ze zo’n ene ’toornwachtster’, want ’t is naemelijk ’n vrouwe. En ’t is nog gieneensen ’n Steenwiekse ook, want ze woont in Willemsoord. Enze komp van oorsprong ook nog ies uut Amerika. Ik kenne eur neet, maor wat denken jullie? Zol Maggie van Buten, want dat is eur naeme, alles weten en kun’n vertellen over de geskiedenis van de Trots vanSteenwiek: onze toorn?
