Kopzorgn deur de Mogge HWE 364
Moi maoten en maotinnen,
Ik zagge veur veertien daeng de Skaandemeter in d’Expres staon. In d’eerste dree maonden van dit jaor is er maor liefst veur zo’n dikke 23.000 euro vernield in Steenwiekerlaand, waorvan meer as d’elfte allenig al in Rams Woerthe. Ik vien ’t diep triest. Weten jullie ook of er wel ies daoders epakt worden en of de kosten dan op eur ver’aeld worden? Bin ‘k wel ies beni’jd naor.
Snappen jullie waoromme as ’t neet zo good gaot mit De Meenthe? Nog neet zo lange eleden eurd’ik allenig maor positieve berichten dat ’t zo good gong en dat ‘r nog meer bezeukers kwamen as in Ogterop in Möppelt en so, maor now zitten ze in de rooie ciefers en mot ‘r personeel ontslön worden. Bin jullie neet bange dat, as ’t zo deur gaot, De Meenthe zôkke oge toegangspriezen gaot vraong dat ’t te duur wordt veur de gewone man? En dat as gevolg daorvan sluting kan dreigen? Of zie ‘k et te somber in?
Bin jullie ook bliede mit de plannen van Bea Klein Hazebroek om de stallen van Spiekervet ni’j leêm in te blaosen? Of denken jullie net zoas veul Steenwiekers : eerst zien en dan geleum’?
Ik wete neet of jullie eluusterd en/of ekeken em’n naor de leste gemeenteraodsvergaedering, maor ik maeke mi’j ’n beetien zorng over de positie van wet’older Wagteveld. Want of ’t een vergissing was van veurzitter Van der Tas of ’n Freudiaanse verspreking, dat weet ik neet, maor ik verstunne dudelijk dat de veurzitter ’t woord gaf an Jaques Wachtgeld. Mot de wet’older zich ook zorng gaon maeken?
