Kopzorgn deur de mogge HWE 359
Moi maoten en maotinnen,
Wat ’n verskoeving in de Steenwiekerlaandiger politiek, vien’n jullie ook neet? Dree wet’olders gaon vort, maor daor koôm’ er viere veur terogge. Ik kriege daordeur ’n eel ander idee bi’j bezunigingen en kostenbespaering. ’t Zal ook wel eêm wennen weên: Meneer Shampoo, bi’j de oldere Steenwiekers ook wèh bekend as ‘Salmiakkie’, as wet’older. Ad volngs jullie Bert Dedden dee functie trouwens neet moên em’n? Maor good, onze Jacques krig o.a. kunst en cultuur in zien portefuulie. Zol dat ook good kun uutpakken veur de SLOS? Wat denken jullie? Maor was de CPB ook neet de peti’je dee destieds estemd ef veur ofskaffing van St. Clemens uut ’t waopen van Steenwiek. Ik denke dat ’t tied wordt dat jullie ‘om ies moên uutneudigen veur wat kritische vraong.
Tiedens de vestingfeesten krig Steenwiek (tiedelijk?) de poorten terogge. Teminste, dat bin de plannen van Steenwiek Vestingstad. Ik zol dat wel aordig vien’n, maor kan dat in disse tied nog wèh? Veule geld investeren om Steenwiek mooi te maeken, om daornao te constateren dat er weer ies vandaolen bin’n dee op eur verneeltochten alles kepot maeken? Ik ebbe d’r een zwaor eufd in, maor miskien bin jullie positiever.
Ik bin ook beni’jd oe jullie denken over de eêmtuele invoering van de Vestingpas. Dat mot dan ’n ‘onderskeidend spaersysteem’ worden. Klaanten krieng spaerpunten as ze wat kopen en as ze ’n bepaold aantal punten em’n, kun ze kiezen veur ’n kedoogien of contaant geld. Maor om te kieken oeveule punten z’em’n, moên ze wel op internet kieken. Now, wat vien’n jullie? Is dat klaantvriendelijk veur de oldere minsen dee gien computer of ’n smartphone em’n? Zoas Lute en Endrik al zeeden: wat iser mis mit zegelties plakken?