Kopzorgn deur de Mogge HWE 362
Moi maoten en maotinnen,
’t Ston in de kraante: tiedens de nacht van Steenwiek tredt Roy Donders op in Steenwiek (ik wete neet eens of i’j kan zingen) en ook de smartlappenband Diep Triest. ’t Zawwèh an mien leeftied ling’, maor ’n ele aomd luustern naor Nederlandstaelige mesiek? Miskien skup ik Jacob iermee wel teung de benen, maor ik bin elemaole neet van de piraotenmesiek of oe ze dat teungwoordig maor ook neumen. Geef mi’j maor olde rockmesiek. A’k nog jonk was, gong ik naor Pink Pop, waor mien idolen optreden: de Stones! Maor dee bin veur Steenwiek neet te betaelen. Bin jullie wel bliede mit Roy en Deep Triest of is ’t behelpen ?
In Steenwiek is ’t betaeld parkeren of’eskaft. De gemeente wil zich zo onderskeiden van buurtgemeentes, waor a’j wel parkeergeld moên betaelen en ‘oopt op disse meniere dat er meer minsen de boskoppen in Steenwiek gaon doon. Maor is dat eigelijk wel zo? Ik zitte mi’j of te vraong’ of vri’j parkeren de oplössink van ’t prebleem is. Volngs mi’j mot de middenstaand veule meer doon om te zorng dat er meer minsen naor Steenwiek gaon veur eur inkopen. An d’aandere kaante snap ik ook wel dat winkeliers de dreiging(?) van ’n hypermaark veulen en daoromme maor bliêm’ ofwachten wat er gaot gebeuren. Oe denken jullie d’r over?
Now, jullie em ’t vaste wel elezen of eurd: Steenwiekerlaand gaot de komende jaoren flink bezunigen. D’r is gien geld veur ni’j beleid. Eigelijk ko’j ’t op de vingers wèh naotellen. Parkeergeld wordt of’eskaft, d’r koôm’ minder inkomsten binnen van ’t Rijk, onzeker’eid over de woningbouw. En wee gaon dat allemaole maarken? Jaowèh, jullie en de rest van d’inwoners van Steenwiekerlaand. Bin jullie eigelijk wel bliede mit ’t ni’je college?
