Moi maoten en maotinnen,

De brogge over de Looijersgrachte wordt op’eknapt. Ik was daor ‘n beetien verbaosd over dat dat now al mos gebeuren. Oe old is dat dink? Twintig jaor of so? ‘t Veurige broggien lag er meer as veertig jaor en daor oefde nooit wat an te gebeuren, omdat i’j degelijk an’elegd was. En as i’j neet esloopt was, ad i’j nog wel minstens veertig jaor mit’ekund. Oelange zol dee brogge over d’Onnegiesstraote ‘t trouwens nog uut’ol’n? Steenwiekerlaand is miskien wel good in ni’je projecten, maor ‘t onder’old ervan? Praot mi’j d’r neet van. Volngs mi’j gef de gemeente liever in één keer ‘n groot bedrag uut, as ze maor onder ‘t onder’old kun uutkomen. Of bin ik daor elemaole mis mit?

Veurige weke völ mien oge op ‘n klein regeltien in ‘t Olde Wieffien. Daor ston: “In 2017 moên de inwoners eur zaeken volledig digitael kun’n of’aandeln mit de gemeente.” Ik neme an dat mit inwoners alle inwoners van Steenwiekerlaand worden bedoold. Dat betekent dus dat de gemeente eigelijk iederene verplicht om ‘n computer an te skaffen. Of zie ‘k dat verkeerd? En wee gaot dat allemaole betaelen? D’r bin genog minsen dee ‘t financieel neet zo breed em’n en zo’n pc neet eensen kun anskaffen. En stel dat iederene in 2017 ‘t internet op gaot, wat gebeurt er dan? Dan bi’j toch op zien minst ‘n snelle internetverbiending neudig? Zol de gemeente dan gratis glasvezel anbieden veur iedere inwoner? Ik bin beni’jd of jullie oe ierover ook ‘n beetien zorng maeken.

Wat vien-n jullie trouwens van al ‘t gedoo over Circus Renz? De Peti’je veur de Dieren is er fel teung dat wilde dieren in ‘t circus optreden, want zeng ze, de dieren ondergaon veul leed. Dus gien wilde dieren mag wel, want dee ondergaon kennelijk gien leed? Ik vien ‘t allemaole wat overdreêm. De meeste dieren in ‘t circus bin er geboren en weten neet eens oe ‘t is om “wild dier” te weên.