Kopzorgn deur de mogge HWE 373

Moi maoten en maotinnen,

B. en W. van Steenwiekerlaand gaon ‘on tour’, kopde d’Opregte Steenwieker. Ze gaon de inwoners van Steenwiekerlaand opzeuken om mit eur ‘t collegeplan te bespreken. Now weet ik neet oe de inwoners van Steenwiekerlaand daor over ‘t algemeen teungover staon, maor ik zagge ‘n foto in de kraante van ‘n inwoner van Blokziel zien twiefels ef, want i’j löt de burgemeester toch maor mooi an de deure staon. Tante Marja mog neet naor binnen.Of zol de foto ‘n ideegien ewest em’n van fotograaf Bi’jzitter?

In Steenwiekerlaand is veul ‘ennep an’etröffen, zo ston ‘r kort eleden in ‘t Olde Wieffien. De pliessie ef in ‘n tuun in Steenwiek ‘n ennepplaante an’etröffen en is vernietigd, net zoas gebeurde mit twee wietplaanten in ‘n tuun in Iesvene en vuuf wietplaanten in ‘n tuun in Sevene. Ik zitte mi’j of te vraong of de pliessie in dee gevallen in overtreding is. Veur zover as ik wete, ma’j in Nederlaand vuuf ennepplaanten kweken, zolange a’j dat maor in oen eigen tuun doon. Wat denken jullie? Wordt ‘t tied dat ook de pliessie gaot weten wat wel en neet mag?

D’Elfduzend is weer achter de rogge, maor ik vun er dit jaor gien sfeer inzitten. Neet dat dat komp omdat er gien kaarmes was eur. Daor kom ik al jaoren neet meer, dus dee mis ik ook neet. Nee, d’Elfduzendmaark was in mien ogen ‘n tamme bedooning. Naarngs ‘n stôkkien mesiek om de bool wat op te vrolijken, naarngs knelpunten waor a’j neet deur kon’n komen, naarngs staandwaarkers dee veul pebliek trökken (ofgezien van de sneupverkoper dan). Ik kriege de indrôk dat de belangriekste jaormaark van Steenwiek op staarven nao dood is. En dat vien ik artstikke jammer. Wat mot er volngs jullie gebeuren om disse treditie toch nog in staand te ol’n? Ef de gemeente ier miskien ‘n taek of aanders de Stichting Steenwiek Vestingstad? Of gewoon ofskaffen?