en dan 
Stellingwarver Schrieversronte prissenteert ni’je dichtbundel ‘Tegere’
Roely Bakker uut Makkinge en Harmen Houtman uut et Vene hebben saemen een dichtbundel maekt die uutgeven wodt deur de Stellingwarver Schrieversronte. De titel van de in augustus uutkommen dichtbundel ‘Tegere’, slat op de twie schrievers, die disse uutgifte saemenstelden.
Roely Bakker is al jaoren dichteresse en heur wark gaot over meenselike en gevulige onderwarpen. Heur gedichten tellen meerstal een beparkt tal woorden, waorin ze hiel angriepend et leven beschrieven kan. Van heur haand verschenen eerder een bundel mit eigen wark Zuver nuver/Nuver Zuver(2006) en de uutgifte Verzin (2011) mit verhaelen. In 2006 wun ze de Stellingwarver Schrieveri’jepries met kleindochter Renée.
Harmen Houtman schrift sund de oprichting van de Stellingwarver Schrieversronte begin jaoren zeuventig. Zien onderwarpen gaon over zien eigen leven, de keunst en et laandschop. Van him verschenen eerder drie dichtbundels en iene mit verhaelen. In 2024 kreeg hi’j de H.J. Bergveldpries veur al zien schrieveri’je. Al jaoren schrift hi’j lietteksten veur zangers en muzikaanten. Van beide schrievers verscheen wark in een protte verzaemelbundels.
In disse ni’je bundel staon een dikke vuuftig vassen, verdeeld in blokken van vufe per dichter. D’r bin ok twie thema’s waor elk zien eigen gedicht op maekt het.
Naost bestaonde vassen, soms bewarkt, staon d’r een aorig tal ni’jen in. De opmaek van et boek is biezunder vormgeven deur Sytse Veldema uut Dwingel.
‘Tegere’ is uutgeven deur de Stellingwarver Schrieversronte en te koop veur € 12,50 in de boekewinkel of via www.stellingwarfs.nl
| De tuun van tied
Ze dwaelt now deur de tuun van tied, is ‘veur en nao’ vergeten, ’t poppewiegien, zol ze’ t weten, de rest van ’t goeie leven niet…
Ze is gien mem meer en gien vrouw, het et vertrouwde huus verleuren, de meensken die heur daegen kleuren bin onbekenden, verget ze gauw…
D’r bin gien daegen meer, gien uren, sterend kikt naor de grieze locht, pertretten vullen oolde muren,
’t begin van de onwisse tocht, ze kan et leven niet meer sturen, wet niet dat ze hiér iens an docht… Harmen |
Piepschoft
In de nevel van de slaop zwevend tussen droom en warkelikhied rustend in de kroeming van jow waarme lief hoolt de tied piepschoft. Roely |
